جاني خبر في غربتي قيل بركـود
صوب الرياض أسرع وشد الرحالي
قلت السبب قالوا مريضٍ وبـه زود
على فراشـه طايـحٍ مـن ليالـي
ويبي يشوفك دامه اليـوم موجـود
وعلك تشوفـه لا وصلتـاه سالـي
حاولت أعرفه قالوا الوقت محـدود
لا لا تضيع وقتـك اليـوم غالـي
رجعت فكري تايـهٍ شبـه مفقـود
متخـدرٍ قلبـي وجسمـي وبالـي
وساعة دخلت البيت بالناس محشود
والكل منهم يزعج الصـوت عالـي
حتى الصغير اللي من أيام مولـود
يبكي ودمعه فوق الأوجـان سالـي
نشدتهم وش صار بأيامي السـود
من هو توفى مـن فقدنـاه غالـي
قالوا ترى أمك يابن الأجواد فالعود
فالعود مدفونه مـن أربـع ليالـي
جاها قضاها ويومها يوم موعـود
والمـوت حـق وكلنـا للزوالـي
من هرجهم حبل الحزن صار معقود
في خافقي والموت وقتـه طرالـي
حاولت أجامل كل من كان موجـود
لا شك حزني ترجم أحـوال حالـي
وإنهل دمعي وإنتثر فـوق الخـدود
ساعة نظـرت فراشهـا والعيالـي
يا ليتني في قبرها اليـوم ممـدود
وهي على الخد الوسيعـه بدالـي
لا شك حكم الرب ما عنـه مـردود
آمنـت بـه ربـي عليـه إتكالـي
ليست هناك تعليقات:
إرسال تعليق